मण्डलवर्गीकरणम्

हे अग्ने ऊर्ध्वोभव । रक्शोहननार्थमुद्युक्त भव । अस्मदस्मत्तोऽधि अधिकान्राक्षसान् प्रति विध्य । प्रत्येकं ताडय । दैव्यानि तेजांसि चाविष्कृणुष्व । आविष्कुरु । एतत्त्रयं विधाय यातुजूनां यतयितुं प्राणिनः क्लेशयितुं ये जवं कुर्वन्ति तेषां यातुधानानां स्थिरा दृढानि धनूंष्यव तनुहि । अवगतज्यानि कुरु । किञ्च जामिमजामिं बन्धुमबन्धुं शत्रून्प्रमृणीहि । प्रजहि । यद्वा । जामिं यः पूर्वं प्रहृतस्तम् । अजामिं पूर्वमप्रहृतम् । एवं भूतान् शत्रून् जहि । प्रहृतोऽयमित्यपेक्शां मा क्रुथाः । आविष्कृणुष्वेत्यत्र संहितायामिदुदुपधस्य चाप्रत्ययस्येति षत्वम् । तनुहि । तनोतेर्लोट्युतश्च प्रत्ययाच्छन्दसि वावचनमिति हेर्लुगभावः । यातुजूनाम् । जु गतौ । क्विब्वचीत्यादिना क्विप् । दीर्घः । आमि छान्दसो नुम् । मृणीहि । मृङ् प्राणत्यागे । अन्तर्भावितण्यर्थस्य लोटि बहुलं छन्दसीति विकरणस्य श्ना । निघातः ॥ ५ ॥