मण्डलवर्गीकरणम्

हे अग्ने अयानया समिधा दीप्या स्तुत्या ते त्वां विधेम । परिचरेम । अस्माभिः शस्यमानमिमं स्तोमं स्तोत्रं प्रति गृभाय । प्रतिगृहान । अशसः । शंसन्ति स्तुवन्तीति शसः स्तोतारः । ते न भवन्तीत्यशसो नृशंसाः । तान्रक्शसो दह । भस्मसात्कुरु । हे मित्रमहो मित्रैः पूजनीय हे अग्ने द्रुहो द्रोग्धुर्निदो निन्दकादवद्यात्परिवादाच्चास्मान् पाहि । रक्ष । गृभाय । ग्रहेर्लोटि छन्दसि शायजपीति श्नः शायच् । हृग्रहोर्भः । पाहि । वाक्यभेदादनिघातः । निदः । णिदि कुत्सायाम् । क्विप् । आगमशसनस्यानित्यत्वान्नुमभावः । सावेकाच इति विभक्तेरुदात्तत्वम् । अवद्यात् । अवद्यपण्येति यत् । ययतोश्चातदर्थे । पा. ६-२-१५६ । इत्यन्तोदात्तत्वम् । मित्रमहो अवद्यादित्यत्र संहितायामव्यादवद्यादित्येङः प्रकृतिभावः ॥ १५ ॥